വരന്തരപ്പിള്ളി പഞ്ചായത്തില്‍ മുപ്ലിയം ഗ്രൗണ്ടിന് സമീപം പ്രവര്‍ത്തിച്ചിരുന്ന ജനകീയ ആരോഗ്യ കേന്ദ്രം മാസങ്ങളായി അടഞ്ഞുകിടക്കുകയാണെന്ന് ആക്ഷേപം
കാലപ്പഴക്കം മൂലം ബലക്ഷയം ബാധിച്ച കെട്ടിടം പൊളിച്ച് പുതിയ കെട്ടിടം നിര്‍മ്മിച്ച് പ്രവര്‍ത്തനം തുടരണമെന്ന ആവശ്യം ശക്തമാകുന്നു.വരന്തരപ്പിള്ളി പഞ്ചായത്തിലെ 14, 15 വാര്‍ഡുകളിലെ ജനങ്ങള്‍ പ്രയോജനകരമാകുന്ന ജനകീയ ആരോഗ്യ കേന്ദ്രമാണ് അടഞ്ഞുകിടക്കുന്നത്. ഗര്‍ഭിണികള്‍ക്കും കുഞ്ഞുങ്ങള്‍ക്കും പ്രതിരോധ കുത്തിവെയ്പ്പും മരുന്നു വിതരണവും ഇവിടെ നടന്നിരുന്നു. അര നൂറ്റാണ്ടിലേറെക്കാലം ഇവിടെ സ്ഥാപനം പ്രവര്‍ത്തിച്ചിരുന്നു. ബലക്ഷയം ബാധിച്ച് തകരാറിലായിരിക്കുന്ന കെട്ടിടത്തിന്റെ ചുറ്റും പാഴ്‌ച്ചെടികള്‍ വളര്‍ന്നു നില്‍ക്കുകയാണ്. ചുമരുകളില്‍ പലയിടത്തും വിള്ളലുകളും ഉണ്ട്. മേല്‍ക്കൂരയും തകര്‍ച്ചയുടെ വക്കിലാണ്. മോട്ടോര്‍ കണക്ഷനുള്ള കിണറും ഉപേക്ഷിക്കപ്പെട്ടനിലയിലാണ്. …
