രുചികരം, പോഷകസമൃദ്ധം; വിഷുസദ്യ വെറുമൊരു വിരുന്നല്ല, ആരോഗ്യക്കൂട്ടാണ്!

മലയാളിയുടെ വിഷു ആഘോഷം പൂർണ്ണമാകുന്നത് തൂശനിലയിലെ വിഭവസമൃദ്ധമായ സദ്യയോടെയാണ്. നാവിൻതുമ്പിൽ രുചിമേളം തീർക്കുന്ന സദ്യ വെറുമൊരു ഭക്ഷണമല്ല, മറിച്ച് പോഷകങ്ങളുടെ ഒരു കലവറ കൂടിയാണ്. അവിയലും സാമ്പാറും മുതൽ ഇഞ്ചിക്കറിയും പായസവും വരെ നീളുന്ന സദ്യയുടെ ആരോഗ്യ രഹസ്യങ്ങൾ എന്തൊക്കെയാണെന്ന് നോക്കാം.

1. പച്ചക്കറികളുടെ കലവറ: സദ്യയിലെ പ്രധാന ആകർഷണം പച്ചക്കറികളാണ്. വിറ്റാമിനുകളുടെയും മിനറലുകളുടെയും ഖനിയായ അവിയൽ, സാമ്പാർ, തോരൻ, കിച്ചടി എന്നിവ ആരോഗ്യത്തിന് ഏറെ ഗുണകരമാണ്. ഇതിൽ അടങ്ങിയിരിക്കുന്ന ഫൈബർ അഥവാ നാരുകൾ ദഹനം സുഗമമാക്കാനും മലബന്ധം തടയാനും സഹായിക്കുന്നു.

2. പ്രോട്ടീനും ദഹനവും: മോര്, രസം, പുളിശ്ശേരി എന്നിവ പ്രോട്ടീനിനാൽ സമ്പന്നമാണ്. ഇത് പേശികളുടെ ആരോഗ്യം മെച്ചപ്പെടുത്തുന്നു. മോരിലടങ്ങിയിരിക്കുന്ന ഗുണകരമായ ബാക്ടീരിയകൾ കുടലിന്റെ ആരോഗ്യത്തിന് ഉത്തമമാണ്. കൂടാതെ, സദ്യയിലെ ‘പുലി’യായ ഇഞ്ചിക്കറി ദഹനപ്രശ്നങ്ങൾക്കുള്ള ഏറ്റവും നല്ല ഔഷധമാണ്.

3. നെയ്യും അച്ചാറുകളും: നെയ്യിൽ അടങ്ങിയിരിക്കുന്ന വിറ്റാമിൻ എയും ഒമേഗ 3 ഫാറ്റി ആസിഡുകളും ചർമ്മത്തിന്റെ തിളക്കം വർദ്ധിപ്പിക്കുന്നു. വിറ്റാമിൻ സിയുടെ കലവറയായ നാരങ്ങ, മാങ്ങ അച്ചാറുകൾ ശരീരത്തിന്റെ മെറ്റബോളിസം നിയന്ത്രിക്കാൻ സഹായിക്കുന്നവയാണ്.

4. മധുരപ്പായസം: സദ്യയുടെ മധുര സമാപ്തിയായ പായസം രുചി മാത്രമല്ല നൽകുന്നത്. ശർക്കര ചേർത്ത് തയ്യാറാക്കുന്ന പായസത്തിലൂടെ ഇരുമ്പ്, സിങ്ക്, പൊട്ടാസ്യം തുടങ്ങിയ മൂലകങ്ങൾ ശരീരത്തിന് ലഭിക്കുന്നു.

ചുരുക്കത്തിൽ, മിതമായ അളവിൽ കഴിച്ചാൽ ഒരു പൂർണ്ണ ആരോഗ്യദായകമായ ആഹാരമാണ് സദ്യ. രുചിയോടൊപ്പം ആരോഗ്യവും പ്രധാനം ചെയ്യുന്ന ഈ വിഷുസദ്യ നമുക്ക് സന്തോഷത്തോടെ ആസ്വദിക്കാം.