ചൊവ്വൂരില് പോലീസുകാരനെ വെട്ടി രക്ഷപ്പെട്ട പ്രതിയും കൂട്ടാളികളും നന്തിക്കരയില് നിന്നും പിടിയിലായി. കൊലക്കേസ് അടക്കം ക്രിമിനല് കേസുകളിലെ പ്രതി ചൊവ്വൂര് സ്വദേശി ജിനോ ജോസ്, സഹോദരന് മെജോ ജോസ്, സുഹൃത്ത് അനീഷ് എന്നിവരാണ് അറസ്റ്റിലായത്. പോലീസുകാരനെ വെട്ടി രക്ഷപ്പെട്ട സംഘത്തിനെ ദേശീയപാത നന്തിക്കരയില് വെച്ച് പുലര്ച്ചെ ഒരു മണിയോടെയാണ് പിടികൂടിയത്. ആക്രമണത്തിന് ശേഷം സ്വിഫ്റ്റ് കാറില് രക്ഷപ്പെട്ട ജിനോയും മേജൊയും വഴില് വെച്ച് സ്വിഫ്റ്റ് കാര് ഉപേക്ഷിച്ച് സുഹൃത്ത് അനീഷിന്റെ ഓഡി കാറില് രക്ഷപ്പെടുകയായിരുന്നു. തുടര്ന്ന് പ്രതികള്ക്കായി സ്റ്റേഷനുകളിലേക്ക് വിവരം കൈമാറിയത് അനുസരിച്ചുള്ള പരിശോധനയിലായിരുന്നു ഒരു മണിയോടെ നന്തിക്കരയില് വെച്ച് പ്രതികളെ പിടികൂടിയത്. മൂവരേയും ചേര്പ്പ് സ്റ്റേഷനില് എത്തിച്ച് അറസ്റ്റ് രേഖപ്പെടുത്തി. ചേര്പ്പ് സ്റ്റേഷനിലെ സിപിഒയും ഡ്രൈവറുമായ സുനിലിനാണ് ചൊവ്വാഴ്ച വൈകീട്ട് 7.45ഓടെ വെട്ടേറ്റത്. മുഖത്ത് വെട്ടേറ്റ സുനിലിനെ കുര്ക്കഞ്ചേരിയിലെ സ്വകാര്യ ആശുപത്രിയില് പ്രവേശിപ്പിച്ചിരിക്കുകയാണ്. മേഖലയില് സംഘര്ഷം ഉണ്ടെന്ന വിവരത്തിന്റെ അടിസ്ഥാനത്തില് എത്തിയതായിരുന്നു ചേര്പ്പ് പൊലീസ്. ഇതിനിടെ പ്രതിയുടെ വീട്ടിലും തര്ക്കമുണ്ടായിരുന്നു. ഇത് അന്വേഷിക്കാന് വീട്ടിലെത്തിയപ്പോഴാണ് ജിനോ വാളുകൊണ്ട് സുനിലിന്റെ മുഖത്ത് വെട്ടിയത്.
പൊലീസുകാരനെ വെട്ടി പരുക്കേല്പ്പിച്ച പ്രതികള് നന്തിക്കരയില് നിന്ന് പിടിയിലായി
