കാലിക്കറ്റ് എഫ്സി ഫുട്ബോള് താരം റിജോണ് ജോസിന് ബൈക്കപടകത്തില് ദാരുണാന്ത്യം. കോഴിക്കോട്, മലബാര് ക്രിസ്ത്യന് കോളേജിന് സമീപത്തുണ്ടായ അപകടത്തിലാണ് തൃശൂര് സ്വദേശി റിജോണ് ജോസ് മരിച്ചത്. സഹതാരം ഗനി അഹ്മദ് നിഗം ഗുരുതര പരുക്കുകളുമായി ആശുപത്രിയിലാണ്.
ഞായറാഴ്ച രാത്രി ഇവര് സഞ്ചരിച്ച ബൈക്ക് മറ്റൊരു ബൈക്കുമായി കൂട്ടി ഇടിക്കുകയായിരുന്നു. പരുക്കേറ്റ ഇരുവരെയും ഉടന് ആശുപത്രിയില് എത്തിച്ചു. എന്നാല് റിജോണ് ജോസിന്റെ ജീവന് രക്ഷിക്കാന് കഴിഞ്ഞില്ല. സൂപ്പര് ലീഗ് കേരളയില് കാലിക്കറ്റ് എഫ്സിയുടെ പ്രതിരോധ താരമാണ് റിജോണ്. ഫോഴ്സ കൊച്ചി, എഫ്സി കേരള എന്നീ ക്ലബുകള്ക്കും വേണ്ടിയും താരം കളിച്ചിട്ടുണ്ട്. ഗനി അഹമ്മദ് നിഗം കഴിഞ്ഞ സന്തോഷ് ട്രോഫിയില് കേരളത്തിന് വേണ്ടി കളിച്ചിരുന്നു.
