കുന്നംകുളം ചെറുവത്തൂരില് സ്വകാര്യ ബസ് അഞ്ച് വാഹനങ്ങളില് ഇടിച്ചുകയറിയുണ്ടായ അപകടത്തില് രണ്ടുപേര് മരിച്ചു. കാര് യാത്രക്കാരിയായ 18 വയസ്സുള്ള റിയ ഫാത്തിമ, അയ്യംപറമ്പ് സ്വദേശി 51 വയസ്സുള്ള തങ്കമണി എന്നിവരാണ് മരിച്ചത്.
മരുമകനൊപ്പം ബൈക്കില് സഞ്ചരിക്കുന്നതിനിടെ ആണ് തങ്കമണി അപകടത്തില്പ്പെട്ടത്. അപകടത്തില് 12 പേര്ക്ക് പരുക്കേറ്റു. അതില് ഒരാളുടെ നില ഗുരുതരമാണ്. കുന്നംകുളം – പട്ടാമ്പി റോഡില് താഴത്തെ പെട്രോള് പമ്പിന് സമീപം ആയിരുന്നു അപകടം. കുന്നംകുളം ഭാഗത്തേക്ക് വരികയായിരുന്ന നിയന്ത്രണം വിട്ട സ്വകാര്യ ബസ് അഞ്ച് വാഹനങ്ങളില് ഇടിച്ചു കയറുകയായിരുന്നു. വ്യാഴാഴ്ച ഉച്ചയ്ക്ക് രണ്ടേക്കാലോടെയാണ് സംഭവം.
ആദ്യം ഒരു സ്കൂട്ടറിലിടിച്ച ബസ് തുടര്ന്ന് മറ്റ് വാഹനങ്ങളെ തകര്ത്ത് സമീപത്തെ വീടിന്റെ മതില് ഇടിച്ചു തകര്ത്താണ് നിന്നത്. പരുക്കേറ്റ എല്ലാവരെയും ഉടന് തന്നെ കുന്നംകുളത്തെ സ്വകാര്യ ആശുപത്രിയില് പ്രവേശിപ്പിച്ചു. അപകടത്തിന്റെ സിസിടിവി ദൃശ്യങ്ങള് പുറത്തുവന്നു.
