തൃശ്ശൂർ വലപ്പാട് എടമുട്ടത്തെ ധനകാര്യ സ്ഥാപനത്തിന്റെ ചില്ലുവാതിൽ തകർത്ത് മോഷണത്തിന് ശ്രമിച്ച കേസിലെ പ്രതി പിടിയിൽ. വലപ്പാട് പൊലീസ് സ്റ്റേഷനിലെ ഗുണ്ട പട്ടികയിലുള്ള വട്ടപ്പരത്തി കരേപറമ്പിൽ വീട്ടിൽ ‘കണ്ണപ്പൻ’ എന്ന് വിളിക്കുന്ന ജിതിനെയാണ് (34) തൃശ്ശൂർ റൂറൽ പൊലീസ് അറസ്റ്റ് ചെയ്തത്.
ഇക്കഴിഞ്ഞ മാർച്ച് 14-നായിരുന്നു കേസിനാസ്പദമായ സംഭവം. എടമുട്ടത്ത് പൂട്ടിയിട്ടിരുന്ന ധനകാര്യ സ്ഥാപനത്തിൽ മോഷണം നടത്താനായി പ്രതി അതിക്രമിച്ച് കയറുകയായിരുന്നു.
- നഷ്ടം: സ്ഥാപനത്തിന്റെ മുൻവശത്തെ ചില്ലുവാതിൽ തകർത്ത് അകത്തുകടന്ന പ്രതി ഏകദേശം 15,000 രൂപയുടെ നാശനഷ്ടങ്ങൾ വരുത്തി. എന്നാൽ മോഷണശ്രമം പരാജയപ്പെട്ടതോടെ ഇയാൾ സ്ഥലത്തുനിന്ന് കടന്നുകളയുകയായിരുന്നു.
- ക്രിമിനൽ പശ്ചാത്തലം: അറസ്റ്റിലായ ജിതിൻ നിസ്സാരക്കാരനല്ല. വധശ്രമം ഉൾപ്പെടെയുള്ള 12-ഓളം ക്രിമിനൽ കേസുകളിൽ പ്രതിയാണ് ഇയാളെന്ന് പൊലീസ് അറിയിച്ചു. വലപ്പാട് പോലീസ് സ്റ്റേഷനിലെ റൗഡി ലിസ്റ്റിൽ ഉൾപ്പെട്ടയാളാണ് ‘കണ്ണപ്പൻ’.
വലപ്പാട് പൊലീസ് ഇൻസ്പെക്ടർ എ അനിൽകുമാർ, സബ് ഇൻസ്പെക്ടർ സി.എൻ എബിൻ എന്നിവരുടെ നേതൃത്വത്തിലുള്ള സംഘമാണ് പ്രതിയെ വലയിലാക്കിയത്. ജിഎസ്ഐ സാബു, സീനിയർ സിവിൽ പൊലീസ് ഓഫീസർ സോഷി, സിവിൽ പൊലീസ് ഓഫീസർമാരായ മൻസൂർ, അബീഷ് എന്നിവരും അന്വേഷണ സംഘത്തിലുണ്ടായിരുന്നു. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.
