ശക്തമായ മഴയെ തുടര്ന്നുണ്ടായ വെള്ളപ്പൊക്കത്തെ തുടര്ന്ന് പറപ്പൂക്കര ഗ്രാമപഞ്ചായത്തിലെ 5, 6 വാര്ഡുകളിലെ പന്തല്ലൂര് ദേശത്ത് നിന്ന് 13 കുടുംബങ്ങളിലെ 36 പേരെ പന്തല്ലൂര് ജനത അപ്പര് പ്രൈമറി സ്കൂളില് പ്രവര്ത്തിക്കുന്ന ദുരിതാശ്വാസ ക്യാമ്പിലേക്ക് മാറ്റിപ്പാര്പ്പിച്ചു.
ദുരിതാശ്വാസ ക്യാമ്പ് കെ.കെ. രാമചന്ദ്രന് എം.എല്.എയും ജില്ലാ കളക്ടര് ശിഖ സുരേന്ദ്രനും സന്ദര്ശിച്ച് ക്യാമ്പിലെ സൗകര്യങ്ങളും ക്രമീകരണങ്ങളും വിലയിരുത്തി. ഗ്രാമപഞ്ചായത്ത് പ്രസിഡന്റ് ബീനാ സുരേന്ദ്രന്, ജനപ്രതിനിധികളായ കെ. സുധാകരന്, അജിതാ രമേശന്, മുകുന്ദപുരം ഭൂരേഖ തഹസില്ദാര് ആന്റോ ജേക്കബ് എന്നിവരും സന്ദര്ശനത്തില് പങ്കെടുത്തു. അതേസമയം, പറപ്പൂക്കര പഞ്ചായത്തിലെ തൊട്ടിപ്പാള് കര്ഷക സമാജം സ്കൂളില് ഒരു കുടുംബത്തെയും സുരക്ഷിതമായി മാറ്റിപ്പാര്പ്പിച്ചതായി അധികൃതര് അറിയിച്ചു.
