നിയമസഭാ തിരഞ്ഞെടുപ്പിന്റെ ഭാഗമായി ജില്ലയിൽ ഹോം വോട്ടിങ് നടപടികൾ സജീവമായി തുടരുന്നു. ആദ്യ രണ്ട് ദിവസങ്ങളിലായി 5836 പേരാണ് വീടുകളിലിരുന്ന് വോട്ട് രേഖപ്പെടുത്തിയത്. ഭിന്നശേഷിക്കാർക്കും 85 വയസ്സ് പിന്നിട്ടവർക്കുമായി ഒരുക്കിയ ഈ സംവിധാനത്തിന് വലിയ സ്വീകാര്യതയാണ് മണ്ഡലങ്ങളിൽ ലഭിക്കുന്നത്. ഏപ്രിൽ 6 വരെയാണ് ജില്ലയിൽ ഹോം വോട്ടിങ് സൗകര്യം ഉണ്ടായിരിക്കുക.
ജില്ലയിലെ 13 നിയോജക മണ്ഡലങ്ങളിലായി അപേക്ഷ നൽകിയ വോട്ടർമാർക്കായാണ് ഉദ്യോഗസ്ഥർ വീട്ടുപടിക്കൽ എത്തുന്നത്. മാർച്ച് 30-ന് നടന്ന ആദ്യ ദിന വോട്ടെടുപ്പിൽ 2907 പേരും, തൊട്ടടുത്ത ദിവസമായ മാർച്ച് 31-ന് 2929 പേരും വോട്ട് രേഖപ്പെടുത്തി. 40 ശതമാനത്തിലധികം ഭിന്നശേഷിയുള്ളവർക്കും മുതിർന്ന പൗരന്മാർക്കും ബൂത്തിലെത്താതെ തന്നെ ജനാധിപത്യ പ്രക്രിയയുടെ ഭാഗമാകാൻ ഇതിലൂടെ സാധിക്കുന്നു.
രണ്ട് പോളിങ് ഉദ്യോഗസ്ഥർ, ഒരു മൈക്രോ ഒബ്സർവർ, പോലീസ് ഉദ്യോഗസ്ഥൻ, വീഡിയോഗ്രാഫർ എന്നിവരടങ്ങുന്ന പ്രത്യേക സംഘമാണ് വോട്ട് ശേഖരിക്കുന്നത്. ജില്ലയിലാകെ 192 ടീമുകളെയാണ് ഈ ദൗത്യത്തിനായി വിന്യസിച്ചിരിക്കുന്നത്. വോട്ട് രേഖപ്പെടുത്തുന്ന സമയത്ത് വോട്ടർ വീട്ടിലില്ലെങ്കിൽ, മുൻകൂട്ടി അറിയിച്ച് ഒരു തവണ കൂടി ഉദ്യോഗസ്ഥർ സന്ദർശനം നടത്തും.
പൂർണ്ണമായും രഹസ്യസ്വഭാവം സൂക്ഷിച്ചും സുരക്ഷാ മാനദണ്ഡങ്ങൾ പാലിച്ചുമാണ് വോട്ടെടുപ്പ് നടക്കുന്നത്. ഏപ്രിൽ 6-ഓടെ ജില്ലയിലെ മുഴുവൻ ഗുണഭോക്താക്കളുടെയും വോട്ടുകൾ ശേഖരിക്കാനാണ് ലക്ഷ്യമിടുന്നത്. കൃത്യമായ പ്ലാനിംഗോടെയുള്ള ഈ നീക്കം വോട്ടിങ് ശതമാനം വർദ്ധിപ്പിക്കാൻ സഹായിക്കുമെന്നാണ് തിരഞ്ഞെടുപ്പ് കമ്മീഷന്റെ വിലയിരുത്തൽ.
ഓരോ വോട്ടിനും മൂല്യമുണ്ടെന്ന സന്ദേശവുമായി ഉദ്യോഗസ്ഥർ ജില്ലയുടെ മുക്കിലും മൂലയിലും ഉള്ള വീടുകളിലേക്ക് ബാലറ്റ് പെട്ടിയുമായി യാത്ര തുടരുകയാണ്.
