കേരളം വിധി കാത്തിരിക്കുകയാണ്. അഞ്ചു വർഷത്തെ ഭരണത്തുടർച്ചയോ അതോ ഭരണമാറ്റമോ എന്ന് തിങ്കളാഴ്ച ഉച്ചയോടെ വ്യക്തമാകും. വോട്ടെണ്ണലിന് ഇനി കേവലം രണ്ട് ദിവസത്തെ കാത്തിരിപ്പ് മാത്രം ബാക്കിനിൽക്കെ, മുന്നണികളെല്ലാം തന്നെ തികഞ്ഞ ആത്മവിശ്വാസത്തിലാണ്. അതീവ ജാഗ്രതയിലാണ് സംസ്ഥാനത്തെ തിരഞ്ഞെടുപ്പ് സംവിധാനങ്ങൾ.
തിങ്കളാഴ്ച രാവിലെ എട്ടു മണിയോടെ ബാലറ്റുകൾ എണ്ണിത്തുടങ്ങുന്നതോടെ കേരളത്തിന്റെ പുതിയ നായകനെക്കുറിച്ചുള്ള ആദ്യ സൂചനകൾ പുറത്തുവരും. സ്ട്രോങ്ങ് റൂമുകളിൽ മൂന്നടുക്ക് സുരക്ഷയിലാണ് വോട്ടിങ് യന്ത്രങ്ങൾ. വോട്ടെണ്ണലിനുള്ള എല്ലാ സജ്ജീകരണങ്ങളും പൂർത്തിയായതായി മുഖ്യ തിരഞ്ഞെടുപ്പ് ഓഫീസർ അറിയിച്ചിട്ടുണ്ട്.
എക്സിറ്റ് പോൾ ഫലങ്ങൾ അനുകൂലമായതോടെ യുഡിഎഫ് ക്യാമ്പുകൾ സജീവമാണ്. എന്നാൽ വിജയം ഉറപ്പിക്കുന്നതിനിടയിലും കോൺഗ്രസിനുള്ളിൽ മുഖ്യമന്ത്രി പദത്തെച്ചൊല്ലിയുള്ള ചർച്ചകൾ പുകയുകയാണ്. വി.ഡി. സതീശന് മുസ്ലീം ലീഗ് പരസ്യമായി പിന്തുണ പ്രഖ്യാപിച്ചത് ഗ്രൂപ്പ് സമവാക്യങ്ങളെ മാറ്റിയെഴുതാൻ സാധ്യതയുണ്ട്. രമേശ് ചെന്നിത്തല, കെ.സി. വേണുഗോപാൽ പക്ഷങ്ങൾ ഈ നീക്കത്തെ എങ്ങനെ നേരിടുമെന്നത് നിർണ്ണായകമാണ്.
അതേസമയം, എക്സിറ്റ് പോളുകളെ തള്ളിക്കളയുന്ന സമീപനമാണ് ഇടതുമുന്നണിയുടേത്. സർക്കാരിന്റെ ക്ഷേമ പദ്ധതികൾ ജനങ്ങൾ ഏറ്റെടുത്തിട്ടുണ്ടെന്നും അട്ടിമറി വിജയത്തിലൂടെ ഭരണത്തുടർച്ച നേടുമെന്നും സിപിഐഎം ഉറച്ചു വിശ്വസിക്കുന്നു. ശക്തമായ ത്രികോണ മത്സരം നടന്ന ഇടങ്ങളിൽ തങ്ങളുടെ വോട്ടുവിഹിതം വർധിക്കുന്നത് ഗുണകരമാകുമെന്ന പ്രതീക്ഷയിലാണ് എൻഡിഎ. ബിജെപി നേതൃത്വം ബൂത്ത് തിരിച്ചുള്ള കണക്കുകൾ വിശകലനം ചെയ്ത് വരികയാണ്.
