വാട്സാപ്പിലൂടെ ഇനി വിവിധ വീട്ടുബില്ലുകളും യൂട്ടിലിറ്റി ബില്ലുകളും നേരിട്ട് അടയ്ക്കാം. ഇന്ത്യയിൽ ‘ബിൽ പേയ്മെന്റ്സ്’ എന്ന പുതിയ ഫീച്ചർ മെറ്റ അവതരിപ്പിച്ചു. മറ്റ് ആപ്പുകളിലേക്ക് മാറാറില്ലാതെ തന്നെ ഇനി വാട്സാപ്പിലൂടെ ബില്ലുകൾ കണ്ടെത്താനും പണമടയ്ക്കാനും സാധിക്കും.
സേവനങ്ങൾ എങ്ങനെയെല്ലാം: വ്യാഴാഴ്ചയാണ് ഇന്ത്യയിൽ ഈ പുതിയ സേവനം അവതരിപ്പിച്ചത്. മെറ്റയുടെ ഉടമസ്ഥതയിലുള്ള വാട്സ്ആപ്പ്, ഭാരത് കണക്ട് എന്ന ബിൽ പേയ്മെന്റ് സംവിധാനത്തിന്റെ ശൃംഖലയാണ് ഇതിനായി ഉപയോഗിക്കുന്നത്. വൈദ്യുതി, ഗ്യാസ്, വെള്ളം, ഫാസ്റ്റാഗ്, ഇൻഷുറൻസ്, ക്രെഡിറ്റ് കാർഡ്, വായ്പ തിരിച്ചടവ് തുടങ്ങി 30 വിഭാഗങ്ങളിലായി ഇരുപത്തിമൂവായിരത്തോളം ബില്ലർമാരുടെ സേവനം ഇതിലൂടെ ലഭ്യമാകും.
ബില്ലുകൾ എങ്ങനെ അടയ്ക്കാം: വാട്സ്ആപ്പിന്റെ ഹോം സ്ക്രീനിൽ മുകളിൽ കാണുന്ന രൂപ ചിഹ്നത്തിൽ (Rupee Symbol) ടാപ്പ് ചെയ്ത് ബിൽ പേയ്മെന്റ് വിഭാഗത്തിലേക്ക് പ്രവേശിക്കാം. തുടർന്ന് ആവശ്യമായ വിഭാഗവും ബില്ലറും തിരഞ്ഞെടുത്ത് അക്കൗണ്ട് വിവരങ്ങൾ നൽകി സ്ഥിരീകരിക്കുക. വാട്സ്ആപ്പ് നൽകുന്ന ബിൽ തുക പരിശോധിച്ച ശേഷം യുപിഐ (UPI), ഡെബിറ്റ് കാർഡ്, ക്രെഡിറ്റ് കാർഡ് എന്നിവ ഉപയോഗിച്ച് പേയ്മെന്റ് പൂർത്തിയാക്കാം.
ഹൗസ്ഹോൾഡ് ബിൽസ് സമ്മറി: വീട്ടിലെ വിവിധ ബില്ലുകൾ എളുപ്പത്തിൽ കൈകാര്യം ചെയ്യാൻ ‘ഹൗസ്ഹോൾഡ് ബിൽസ് സമ്മറിയും’ വാട്സ്ആപ്പ് അവതരിപ്പിച്ചിട്ടുണ്ട്. നേരത്തെ പണമടച്ച ബില്ലർമാരെ പേയ്മെന്റ്സ് ഹോം സ്ക്രീനിൽ കാണിക്കും. ഒരേ ബില്ലറിന് കീഴിൽ ഒന്നിലധികം അക്കൗണ്ടുകൾ കൈകാര്യം ചെയ്യാനും, വീടിന് പുറമെ ഓഫീസ്, കുടുംബാംഗങ്ങൾ എന്നിവരുടെ ബില്ലുകൾ ഒരൊറ്റയിടത്തുനിന്ന് നിയന്ത്രിക്കാനും ഇതിലൂടെ സാധിക്കും.
ലഭ്യത: ഭാരത് കണക്ട് സംവിധാനത്തിന്റെ പിന്തുണയോടെ പ്രവർത്തിക്കുന്ന ഈ പുതിയ സേവനം ഇന്ത്യയിൽ ഘട്ടംഘട്ടമായാണ് ഉപയോക്താക്കളിലേക്ക് എത്തിക്കുന്നത്. ആൻഡ്രോയിഡ്, ഐഒഎസ് (iOS) ഉപയോക്താക്കൾക്ക് വരും ആഴ്ചകളിൽ ഫീച്ചർ ലഭ്യമാകുമെന്ന് വാട്സ്ആപ്പ് വ്യക്തമാക്കിയിട്ടുണ്ട്.
