അടുക്കള ബജറ്റിന്റെ താളം തെറ്റിച്ചുകൊണ്ട് സംസ്ഥാനത്ത് ഇന്ന് മുതൽ മിൽമ ഉൽപന്നങ്ങൾക്ക് വില കൂടും. പുതുക്കിയ നിരക്ക് പ്രകാരം പാൽ ലിറ്ററിന് 4 രൂപയും തൈരിന് കിലോഗ്രാമിന് 10 രൂപയുമാണ് വർധിക്കുന്നത്. നെയ്യ് ഉൾപ്പെടെയുള്ള മറ്റ് മിൽമ ഉൽപന്നങ്ങൾക്കും വരും ദിവസങ്ങളിൽ വില കൂടിയേക്കുമെന്നാണ് സൂചന.
പുതിയ പാക്കറ്റുകൾ വിപണിയിൽ എത്തുന്നതുവരെ പഴയ വില പ്രിന്റ് ചെയ്ത കവറുകളിലായിരിക്കും പാൽ ലഭ്യമാകുക. കർഷകരുടെ നിരന്തരമായ ആവശ്യവും കാലിത്തീറ്റ വിലവർധനവും പരിഗണിച്ചാണ് വില കൂട്ടാൻ തീരുമാനിച്ചതെന്ന് മിൽമ അധികൃതർ വ്യക്തമാക്കുന്നു.
പുതുക്കിയ വിലവിവരങ്ങൾ:
- മഞ്ഞ കവർ പാൽ: ₹27
- നീല കവർ പാൽ: ₹30
- ഓറഞ്ച് കവർ പാൽ: ₹30
- പച്ച കവർ പാൽ: ₹32
- കൗ മിൽക് (1 ലിറ്റർ ബോട്ടിൽ): ₹75
- തൈര് ക്ലാസിക്: ₹40
- തൈര് എലൈറ്റ്: ₹45
പാൽ വില കൂടിയതോടെ ഏറ്റവും കൂടുതൽ പ്രതിസന്ധിയിലാകുന്നത് സാധാരണക്കാരാണ്. പാചകവാതക വിലക്കയറ്റത്തിന് പിന്നാലെ പാൽ ഉത്പന്നങ്ങൾക്കും വില കൂടിയതോടെ ഹോട്ടൽ ഭക്ഷണത്തിനും വരും ദിവസങ്ങളിൽ ചിലവ് കൂടും. ചായയ്ക്കും മറ്റ് പലഹാരങ്ങൾക്കും വില കൂട്ടേണ്ടി വരുമെന്ന ആശങ്കയിലാണ് ഹോട്ടൽ ഉടമകൾ.
