തൃക്കൂർ ഗ്രാമപഞ്ചായത്തിൽ പാലിയേറ്റീവ് പരിചരണ പരിശീലനം: പങ്കെടുത്തത് മുപ്പതോളം സന്നദ്ധ പ്രവർത്തകർ

തൃക്കൂർ ഗ്രാമപഞ്ചായത്തിന്റെയും കുടുംബാരോഗ്യ കേന്ദ്രത്തിന്റെയും സംയുക്താഭിമുഖ്യത്തിൽ പാലിയേറ്റീവ് പരിചരണ സന്നദ്ധ പ്രവർത്തകർക്കായി സംഘടിപ്പിച്ച ത്രിദിന പരിശീലന പരിപാടി സമാപിച്ചു. ഗ്രാമപഞ്ചായത്ത് പ്രസിഡന്റ് സുന്ദരി മോഹൻദാസ് ഉദ്ഘാടനം നിർവഹിച്ചു. പഞ്ചായത്ത് വൈസ് പ്രസിഡന്റ് പോൾസൺ തെക്കുംപീടിക അധ്യക്ഷത വഹിച്ചു. വിവിധ ദിവസങ്ങളിലായി നടന്ന പരിശീലന ക്ലാസുകൾക്ക് ഡോ. മിഥുൻ റോഷൻ, ഡോ. അമൃത, സ്റ്റേറ്റ് പാലിയേറ്റീവ് കോഡിനേറ്റർ എം.ജി പ്രവീൺ, ജില്ലാ കോഡിനേറ്റർ അനൂപ്, ഹെൽത്ത് ഇൻസ്പെക്ടർ ഇ.എസ് ബൈജു എന്നിവർ നേതൃത്വം നൽകി. ഗ്രാമപഞ്ചായത്ത് അംഗങ്ങളും ആരോഗ്യപ്രവർത്തകരും ഉൾപ്പെടെയുള്ളവർ ചടങ്ങിൽ പങ്കെടുത്തു.